Allir landshlutar
Við fórum tveir frá veitingastadir.is á Rub 23 í Akureyri í kvöldmat á laugardagskvöldi í byrjun apríl. Staðurinn var þéttsetin og mörg kunnugleg andlit úr höfuðborginni sjáanleg. Annar fékk sér lambahryggvöðva með kartöflum eskó og salati ásamt magic pepper sósu. Rétturinn var vel samsettur, hóflega kryddaður, bragðgóður og mjög vel úti látinn (kr. 4.950.) Lambahryggvöðvin var mjúkur og sósan var mjög góð.
Hinn fékk sér sushi rétt, um var að ræða 2 maki rúllur, með 10 bitum hver og því alls 20 bitar (um 4000 kr.). Viðkomandi hefur sjaldan verið eins saddur eftir sushi, sér í lagi þar sem bitarnir voru stærri en maður er vanur og í öðrum réttinum sem hét “ten ten three tempura “ Tempura humar, bleikja, salat, chilly tamago, voru bitarnir djúpsteiktir og því mjög saðsamir. Báðar rúllurnar voru fínar en myndum heldur mæla með hálfri rúllu sem inniheldur 5 bita þar sem þetta verður kannski full einhæft til lengdar – einnig ættu 15 rúllur að nægja flestum.
Með réttunum drukkum við öl og hvítvín. Við deildum í eftirrétt ís og sorbet, sítrónu, vanillu, hindberja, (kr. 1.575), sem var ágætur en þó ekkert frammúrskarandi. Svo fengum við okkur kaffi og grand. Þjónustan var góð einkum í formi rauðklæddra stúlkna. Það eina sem okkur fannst aðeins miður á staðnum var mikill kliður, notaleg tónlist hefði bætt andrúmsloftið.