Von mathús

Lítið fjölskyldurekið mathús við höfnina í Hafnarfirði.

Hugmyndina að því að opna VON má helst rekja til brennandi áhuga og ástríðu þeirra Einars Hjaltasonar og Kristjönu Þuru Bergþórsdóttur á matargerð og rekstri veitingarhúsa, en staðsetningin, og eftirspurnin eftir fjölbreyttri og „local“ matarmenningu í Hafnarfirði, spiluðu einnig stóra rullu þegar ákveðið var láta þennan draum rætast og hefja framkvæmdir.

VON mathús leggur upp með árstíðarbundna íslenska matargerð og hráefnanotkun hverju sinni, bæði í mat og kokteilum.
Hugmyndin er að inni á VON ríki heimilisríkt og persónulegt andrúmsloft og að fagleg þjónusta verði samofin andrúmsloftinu, með þeirri niðurstöðu að öllum líði vel inni á staðnum.

Einar Hjaltason er margrómaður matreiðslumaður sem býr yfir mikilli reynslu úr eldhúsinu. Hann lærði og útskrifaðist á Grillinu, hótel Sögu og tók síðan þátt í opnun Sjávargrillsins, en þar var hann vaktstjóri. Árið 2012 tók hann á brott til London þar sem hann kom að opnun á nýjum „fine dining“ veitingarstað að nafni Dabbous, en staðurinn hlaut Michelin stjörnu aðeins átta mánuðum eftir opnun. Þegar heim var komið tók hann að sér að vera yfirmatreiðslumaður á veitingastaðnum KOL, á Skólavörðustíg þar sem hann hætti nýverið störfum til þess að einbeita sér að opnun veitingahússins VON. Kristjana Þura, annar rekstraraðilinn, er fædd og uppalin í Hafnarfirði og hefur einning mikla reynslu af veitingarstörfum, en undanfarin tíu ár hefur hún sótt störf í veitinga-og hótelgeiranum.